Boerdereie jonde vrüger regelmooëtig getèèsterd dör ratteplooëge. Sjaos da GAIA toen nog ni bestond, want as veë bè ratteklemme, knöppels en oatgehüngerde katt’n op safari trokke no de stal, de sjuur of de grênzoller, dan kos zjee ter van op aon da dooë bloed goenk rondvliege.

Veë zen onderweil wa besjofder gejonne, mé de ratte höbbe nog altèèd dezelfde slêchte meniere va vrügger: ze vreët’n alles kepot! Veur de ratte vòt te krèège kùmt noa ene “gespecialiseerde firma” no Diep’nbeek. Boeëin dei specialisaose bestöt weet iech ni, mè ze goin de Doktoer Grouwelsstrooët ratvrèè maoke, zègge ze toch…

“Gespecialiseerde firma”, ….da gèt aordig wa geld koste. En zègge da mènne nonk Zjef zaoliger vrügger“ ‘nen éénmans-gespecialiseerde firma op z’n èige wes en da nog graotis en vör niks!

Op ‘ne kier koem nonk Zjef toas ‘ns binnevalle wei dooë zjus ’n rat bè heur poet in de klem wes blèève hange. Veë pitsd’n ze vanne sjrik veur dèi val bé dèi aokelige bies aon te raoke, mè nonk Zjef zèi doedkallem: “Iech zal oech ins en veurgoed van dèi ratteplooëg aofhellepe.” Zonner iet te zègge stoek ter het keuterèèzer inne Leuvese stooëf en wè dat vuurroed stond, douwde heë da tege de rat heur ouge da ze ginne stiek ni mè zoeg en dooënooë snörrekte heë ooch nog heur kont touw. Ze ha het ni al te gjan, mè ze goef toch ginne kik. En veë,… veë hoelen ozze oijem èin en vüld’n wei os èige kuntje touwpitsde va kompase. “Voilà,” zei nonk Zjef tege ozze pa,” lùt ze noa mer los obbe zoller, zje zult wel zien wa ter van kumt…”

De rat vloog obbe zoller oat de val en ooch al zoeg ze gèin stiek ni mè, toch loep ze rêch op heur hol aof. Hèit ze dooë gejodeld? Is ze dooë ontploft? Veë höbbe ze in allegeval noets mè trög gezien en ooch al heur bruurs en zùsters wooëre ribbedebie…Mesjien zen ze nog an’t rondtrèkke en zen het dèi ratt’n, dèi noa op het Binneveld zitt’n …?

(Geschreven door Papa Razzi)

Tekst: Externe Bron Fotograaf: Externe Bron