Zondaog is ’t wier te doen. Dan mòite veë wier kleur bekènne…
Iech zien ze alwier stön anne provinciale sjooël: Pier, Rob, Willy… , in ’t blow, zeker de krevat, geflankeërd dör blonde missen, met ouge nog oneindig blooër as de “Méditeranée” van Toon Hermans. Waa ze al nie doen veur oech te verleeën! Op e graosperrekske stöt Hugo, bè z’n hâân aachter z’n grün bretelle, kwêste van de natuur ’n hêndsje te hellepe en zenne “staand” hoeg te hage. Martha is ooch present, mè ze kan wier gèin kleur bekènne en hèit dan mer e bèèsj deu-pjièske aongetrokke. ‘t Is nie te geluive, mer van heur krèèg iech altèèd e pónneke…
Dèi van het Vloms Belang höbbe ’n groete poes bèè vör de Vlomse liew veur te stèlle.
De NVA-ers zènge in koor het nouw volkslied: “O dierbaar Vlaanderen…” en Lode Vereecke, ozze enige parlementèèr, dèilt GSM-mekes oat, boe allèin zenne nummer koeint op krèège.
Vònneke en Marleen stön inne wèind en hage bè twie hâân hun oranje klèidsje onder, just alsof veë nie wete wa tronner zit… Manne bè oranje krevatt’n laache op iedereen en èintige höbbe zoe iet wè ’n aasekröske veur hunne kop. Zeker veur het pluske van “CD&V plus” oat te bèild’n…?
Frank en Patrick zitte bè ’n vuurroi krevat, haand in haand, lengseen in ènne straandzeëtel. Rond hun wê’en de roi rokskes inne wèind en bove hun fladdert Willy Claes, onner de gedaante van e roedboske…
Zjeë kóint het nie geluive, mè dooë tuise dooër waandel iech bè e blow pitsje, ‘n oranje brók, e geël humme, ’n roi krevat, e grün klekske obbe kop en zokke bè alle kleure vanne rèingerbooëg, kwêste van iedereen kontent te stèlle. De minse dènke da iech e brür bèn vanne kloon, deë lotsjes oatdèilt anne kiezers dei bè de vullow kome kieze…
Sjaos da da allemòl mer ’nen aokelige druim is, want zondaog gòin iech onopvallend stömme, in me grèès kestummeke. Iech kiek stèèf veur miech oat, bè m’n ouge op oneindig. Iech höb veur enne keër de maacht in hâân en iech stöm veur weë iech wil! Iech bèn zeker da iech veurre goei gòin kieze…!
Zjeë toch ooch, hoop iech…?
(Geschreven door Papa Razzi)
Tekst: Externe Bron Fotograaf: Externe Bron
